Глава 53

Глава 53

О ЯВЛЕНИИ ЧУДОТВОРЦА СЕРГИА
ПОЛЬСКИМ И ЛИТОВСКИМ ЛЮДЕМ

По отбeжании ис-под Троицкого Сергиева монастыря гетмана Сапeги и Александра Лисовскаго с Польскими и Литовскими людьми и с Рускими измeнники, прииде к Живоначальной Троицы в Сергиев монастырь дворянин Семен Языков. И по молебнем пeнии бывшу ему в келии у келаря Авраамия, и повeда архимариту и келарю глаголя сице: «Преже сих лeт, егда бысть еще сия великая обитель во осадe от Польских и Литовских людей, тогда идущу ми, рече,с Литовскими людьми от града Бeлые в Тушино во время вешнее да со мною игумен Селижаровской Марк Босков. И у игумена полозу санному глубоко обрeзывающуся, к сему же начашя глаголати со мною идущии Поляки: «Мнихи тяжелы суще и вельми сильны; мы тому самовидцы есмы. Егда стояхом под Троицким муром¹, мнихи же, выeжжающе и пeши выходяще, нас многих побивали и в полон имали и наряду много поимали. Да и то мы видeли, и с нами многие панове: един мних ухватил нашу полуторную пищаль и на раму свое возложил, в мур у нас унесе. И се видeвше мы и с нами панове вельми дивишяся и страхом одержими бышя. Многа же и ина видeния видeхом и разумeхом, яко мнихом поспeшествует сила Божиа».

Аз же смиренный слышах сиа и прославих Бога, творящаго дивнаа и преславнаа угодники своими. И повелeх вписати здe и сие, да незабвена будут чюдеса преподобнаго отца нашего Сергиа.