Глава 75

Глава 75

ЧЮДО ПРЕПОДОБНАГО И БОГОНОСНАГО ОТЦА НАШЕГО
СЕРГИА ЧЮДОТВОРЦА О ИСЦEЛEВШЕМ НEМОМ

Не престану, повeсти пишуще, ниже умолчю о чюдесeх повeдати преподобнаго и богоноснаго отца нашего Сергиа чюдотворца, да не получю аз части лениваго раба, скрывшаго талант, и не буду подобен оному черньцу, сохранившему пречестную главу великого Предтечи, еже бы не славитися о ней имени Господню. Но аще и ленив есмь и непотребен, но подобает ми всяко отдати вам добрым торжниником по глаголющей истиннe; и яснe повeдаю вам, благочестивии и истиннии дeлателие винограда Христова. Молю же вы, приклонивше ушеса ваша, прилeжно послушати о новосотворшемся чюдеси пред очима нашима и всeх, иже во обители сей тогда прилучивъшихся. Сотвори бо ся сие чюдо не в древних лeтех, ни в далних странах, но в велицей Лаврe преподобнаго отца нашего Сергиа и во 127-м году (1619 г.), во обстояние королевича Владислава со всeми воинствы его. Тогда убо ему стоящу со всeми своими об едину полунощную страну монастыря по Переславской дорогe в Троицком селe Сватковe, з другую же страну к царьствующему граду путь отворися съeзда ради посольских дeл и отрада бысть во осадe запасам травным к препитанию скота. Сему же чюдеси сказание сицево.

Ноября в 18 день прииде х келарю, старцу Аврамью, и ко всему собору Троицкой стрелец Тимофeй именем, прозванием Коркин, привел с собою человeка и повeда о нем сице, яко той человeк живет полчетверта года¹ в слободах под Троицким монастырем, а был нeм и у рук персты скорчены, нынe же дарова ему Бог здравие и язык. Да вопросят его, како исцeлe. Человeк же он повeда пред келарем и пред братиею: «Аз», – рече, – «рожением Тверскаго уeзда, архиепископля села Борщова, сын священника Михаила, имя мое Василей. И судом Божиим в том селe громом убило в одной избe девять человeк до смерти, а ево десятово убило под щокою у горла, и от того почал быти нeм, и у рук персти скорчилися. И жил в том селe Борщовe полтора года, а здe под манастырем пребываю четвертой год. А прибeгал больши всeх к тому стрeльцу Тимофею Коркину. И нынe в королевичев приход под Троицкой монастырь велено имати всeм осадным людем сeно, с ними же и аз послан бых, от того стрeльца Тимофeя». «Мразу же тогда люту бывшу, азъже», – рече, – «нищетою одержим, и одeяниа нeсть к согрeтию, но рубищи одeян поидох. Мнози же с нами идуще и в теплых одеждах озябаху, от лютости мраза помрошя. Аз же тако же стeсняем от мраза зeло, и уже руки и ноги и лицо измерзло, и възвалихся на пути мертв. Христолюбивии же, подъемше мя, возложишя на сeно мертва. Еще же во мнe дыханию бывшу, и во умe токмо призвах, глаголя: «Великий чюдотворец Сергий, помилуй мя! Аз тебe отпою молебен». «Егда», – рече, – «аз сице помыслих, тогда прииде ко мнe милость его, яко нeкаа теплота; и бых весь тепл, и руки и ноги горячи, и персти рук моих раскорчилися; и с воза снидох, но нeм еще пребых; сeно же с прочими привез к тому Тимофeю здрав. Тогда же прииде на меня сон и уснух мало и паки пробудихся, начах просити пить. Тогда бо разверзеся язык мой и проглаголах первeе. Тогда же вси людие внидошя во удивление, яко нeм бых и проглаголах, и руки мои бышя здравы». «Аз же», – рече, – «от простоты своея забых, еже обeщахся, два дьни пребых, радуяся и славя Бога и чюдотворца Сергиа. А еже отпeти молебен, в небрежение положих, и в третию нощь явися мнe великий в чюдесeх Николае и, понося моему безумию, глаголя: «Вскую, человeче, презрeл молитвы и милость к себe великого чюдотворца Сергиа; и еже обeщался и не сотворил еси? Но, шед скоро, сотвори обeщание свое и повeдай в монастырe келарю и всей братии, да повелят отпeти молебен великому чюдотворцу Сергию».

Мы же слышахом сиа и удивихомся о величии Божии, како прослави и нынe прославляет угодника своего; и повелeхом пeти молебны з звоном, прославляюще заступника своего, великого в чюдесeх, преподобнаго и богоноснаго отца нашего Сергиа. И благовeрному государю царю и великому князю Михаилу Феодоровичю всея Русии о сем чюдеси писали. Вси же людие в дому чюдотворца во осаде, слышаще сиа, зeло возрадовашяся и благонадежни бышя, яко не отступает преподобный, снабдя обитель свою, и чающе избавлениа молитвами его.
Оглавление