Глава 69

Глава 69

О ЯВЛЕНИИ СЕРГИА ЧЮДОТВОРЦА НА МОСКВE
ВО ОСАДE ГАЛАСУНСКОМУ АРХИЕПИСКОПУ АРСЕНИЮ

Не подобает и сего молчанию предати. Молю же вас прилежно послушати, без всякого сомнeниа, внe всякиа суетныя молвы себе сотворше. Приклоните ушеса ваши и услышите о предивных чюдесeх великого отца нашего и чюдотворца Сергиа, паче же о новосотворшемся чюдеси в царьствующем градe Москвe.

Тогда убо Галасунскому архиепископу Арсению бывшу во осадe в Кремлe со окаанными Поляки и с Нeмцы и всeми потребами обнищавшу, – весь бо дом его Поляки и Нeмцы разграбиша и вся имeниа его и запасы поимашя, – архиепископу же, гладом помирающу и уже живота отчаавшуся и отходную ему проговорившу, лежащу же ему в келии со единем старцом, келейником своим, является ему великий в чюдесeх Сергие; пришед х келии тихо, молитву сотворь. Архиепископ же от зельныя немощи едва отвeща: «Аминь». И абие входит в келию его преподобный Сергий, и свeт велий в келии возсиа, и глагола ему святый: «Арсение! Се убо Господь Бог, молитв ради Всенепорочныя Владычица Богородица и великих ради святителей Петра и Алексeя и Ионы и всeх святых, – да и аз грeшный с ними же ходатай бых, – заутра град Китай предает в руцe христианом и врагов ваших вскорe всeх низложит и из града извергнет». Архиепископ же Арсений, очи свои возвед, и ясно видит близ одра его стояща великого чюдотворца Сергиа; и познав¹ его и едва въстав на ногу свою, поклонися ему. Он же невидим бысть от очию его. И свeт он великий, явльшийся в келии его, разыдеся. Архиепископ же, в себe быв, ощути, себе от болeзни здрава и благодарив Бога до утриа.

Заутра же 121-го году (1612 г.), октября в 22 день на память иже во святых отца нашего Аверкиа, епископа Иерапольскаго, по словеси святаго Сергиа чюдотворца, воеводы град Китай приступом взяли и много в нем Литвы и Нeмец побили, оставших же в Кремль вогнали. И обрeтошя много тщанов² и наполов³ плоти человeческиа солены и под стропами⁴ много трупу человeческого; и сeдошя в Китаe христолюбивое воиньство, врагом же большую тeсноту сотворишя. Еретицы же до конца изнемогошя, но, ждуще изручениа, крeпляхуся.