Глава 65

Глава 65

СКАЗАНИЕ ВКРАТЦE О РАЗОРЕНИИ ЦАРЬСТВУЮЩАГО
ГРАДА МОСКВЫ

Кто не восплачется и не возрыдает и теплых слез источники не излиет, аще есть и каменосердечен и жестосерд, о велицем сем царьствующем градe, иже прежде бысть велик и превысок, непобeдим же и прекрасен, и всeм прелюбезен во очию зрящим его? И благочестивыми и великими царьми царьствуем и обладаем бe. И не токмо крeпкими и высокими стeнами, но и многими крeпкими оружиеносцы и храбрыми ратоборцы и премудрыми мужи огражден сый. Паче же святыми церквами и многоцeлебными мощми святых цвeтяше, и молитвами их от вся Содержащаго укрeпляем, растяше и возвышашеся и от многих государьств поклоняем; богатством же и славою и многонародным множеством и превеликим пространством, не токмо в Росии, но и во многих ближних и далних государствах прославляем и удивляем бысть царьствующий сей град Москва, паче же реку Новый Рим. И како толик предивен бысть, во един час падеся, огнем и мечем потреблен бысть. И збысться на нас слово премудраго Соломона реченное: «Злодeяние и беззаконие опровержет престолы сильных». Во истинну благий совeт. Правда же и любовь все созидает и воедино совокупляет, неправда же и созданнаа вся и созидаемаа разоряет и сокрушает.

Видим убо, колика древняя великаа царьства неправды ради и беззакониа падошяся злым падением. Глаголю же Содома, и Вавилона великаго, и Ниневии великии, и Трою предивную; и Ерусалим град святый несохранениа ради закона Господня плeнен бысть. Послeднее же, увы, и конечно плeнение бысть, понеже распяшя Господа славы и не покаашяся. По сем же великий царьствующий Констянтин град, не беззакониа ли ради и неправды плeнен бысть? Окрест же Росии знаемаа нами царьства Татарскаа великаа падошя и в запустeнии бышя. Сице бысть и над царьствующим градом Москвою за премножество беззаконий наших.

Но сия убо по плeнении своем не возмогут въстати; царьствующий же град не тако. Аще и за беззакония нашя и тмочисленыя грeхи мало показа¹ нас Господь, за милость же свою много возлюби и помилова. Егда убо беззакония ради своего смирихомся и восколeбахомся, яко пьяныи, и приближихомся и до врат смертных и возопихом ко Господу, и услыша нас и от бeд наших избави нас. Во-истинну близ есть всeм призывающим его истинною и раскаася по множеству милости своея и порази вспять плeнующих нас врагов наших. Но о сем убо впреди изъявлено будет. Начнем же нынe, о нем же нам слово предлежит.

В царьствующем градe Москвe преждереченнии они Лютори, беззаконнии Поляки и Литва и Нeмцы и отступницы и предателе христианской вeрe Михайло Салтыков, да Федор Ондронов со всeми своими совeтники, видeвше, яко многиа Росийскиа грады познашя их лукавство и злую прелесть и преступление в крестном цeловании и приставов их по всeм градом и по селом множество побиенных, и воевода их князь Иван Куракин с Поляки и с Рускими измeнники к Москвe прибeжал, разбиен от Ивана Васильевича Волынсково с товарыщи, и непщующе вскорe от Рязани и от Володимеря и от Казани и от инeх градов многово Росийского воинства, и по своему лукавому нраву умыслишя злое коварство над царьствующим градом Москвою.

Того же лeта 7119-го (1611 г.), марта в 19 день на Страстной недeли во вторник, Михайло Салтыков и Польские воеводы Гасевской да Струс со всeми Поляки и с Нeмцы начашя сeщи в царьствующем градe Москвe всeх православных христиан. И прежде убо Китай-град затворишя. И ту много множество побишя православных и торги вся разграбишя. По сем же в большом в Бeлом-градe и в древяном вся жилища человeческаа огнем попалишя, и всяк возраст и всяко здание царьствующаго града Москвы, – увы! – огню и мечю предашя. И град древяной весь сожгошя. Церкви же и монастыри и всяку святыню осквернишя и попрашя. Новаго же исповeдника, святeйшаго Ермогена патриарха Московского и всея Русии безчестнe с престола изринушя и в мeстe нужнe затворишя, в нем же и преставися новый исповeдник, скончав течениа своего подвиг.

Сие же гнeвобыстрое наказание от Бога бысть нам за премногиа и тмочисленныя грeхи нашя, понеже Господь многажды наказуя и отвращаа нас от злоб наших и не послушахом, ниже отвратихомся от путей наших лукавых, но в путь Каинов ходихом и в слeд волхва Валама.

Того же дни, на Страстной недeли во вторник, в Троицкой Сергиев монастырь прибeжал с Москвы сын боярской Яков Алеханов и сказал архимариту Дионисию² и келарю старцу Аврамию и всей братии злоубийственую и страшную вeсть, еже сотворися над царьствующим градом Москвою. Архимарит же и келарь и вси сущии во обители, слышавше сиа, зeло сердцы своими востенавше и источницы слез многи излиавше и руцe свои воздeюще ко Всемогущему Творцу и Содeтелю, со слезами молящеся и глаголюще: «Заступниче и Защитниче нашь, Господи, призри на ны и избави нас от уст кровоядливых сих Лютор, и не предай же достояниа своего в руки врагом нашим!» Такожде и ко Всенепорочнeй Владычицe Матери Слова Божиа и к великим чюдотворцом Сергию и Никону со слезами притекше, заступлениа и помощи просяще.

Того же дни отпустили наспeх к Москвe на помощь Ондрея Федоровича Палицына, а с ним слуг 50 человeк, князя Василья Туменсково с товарыщи, да дву сотников стрелецких, Рахманина Базлова да Томила Яганова, а с ними стрeльцов двeстe человeк. А в Переславль Залeской послашя слугу Олексeя Острецова с товарыщи о помощи к воеводам к Ивану Волынскому, да ко князю Федору Волконскому и к дворяном и дeтем боярским и ко всяким служивым людем. По сем же розослашя грамоты во вся грады Росийскиа державы к бояром и воеводам, пишуще к ним о многоплачевном конечном разорении Московскаго государьства, моляще их от различных Божественых Писаний и повeдающе им в писаниих своих, како во многих градeх и в селeх от Литовских людей бывшую конечную погибель и разорение и святым Божиим церквам осквернение и чюдотворным святым образом и многоцeлебным мощем святых поругание, иноком же многолeтным и инокиням добродeтельным, паче же реку невeстам Христовым, обругание и осквернение. Не пощадeша бо окааннии Лютори они, ниже усрамишяся престарeвшихся многолeтных сeдин. От старец даже и до ссущих млеко младенец всякого возраста и всяк народ общий христианский и множество безчисленное во градeх и в селeх христианскиа работныя чади не вси ли от них без милости пострадашя и горькими и лютыми смертьми скончашяся и в плeн разведены бышя? Нынe же окааннии царьствующему граду седьмерицею сугубeйши того сотворишя зло. Паки же воспоминающе тeм от писаниа прежде бывших храбрых мужей за православие скончавшихся: како подвизашяся и пострадашя о вeрe и за отечество даже до смерти; и колицeх даров от Бога сподобишяся приати; от человeк же и по смерти колицeми честьми тогда почтошяся и нынe почитаеми. И им бы такожде возложити упование на Всесильнаго в Троицы Славимаго Бога и на Пречистую Матерь Слова Божиа и на великих свeтил во всей велицeй Росии просиавших, поспeшити немедлено к царьствующему граду на богомерских Польских и Литовских людей и на Руских измeнников ко отмщению крови христианскиа; и постояти бы за благочестие крeпко и мужествено и добыти комуждо себe вeчное имя и похвалы достойно. «Всякому» – глаголюще, – «дeлу едино время надлежит. Аще нынe о правдe не постражем, потом всяко бес пользы и без возданиа умрети же имамы. Во-истинну милостив есть Владыка и человeколюбив. Вопль и молитву раб своих услышит и отвратит праведный свой гнeв и избавит нас от належащиа лютыя смерти и Латынского порабощениа. Токмо сами мужайтеся о Бозe и крeпитеся. И аще Господь с нами, то кто на ны»? Многа же и ина от Божественых Писаний пишуще к ним со многим молением о поспeшении на иноплеменных.

Сицевым же грамотам от обители Живоначальныя Троица во вся Росийскиа грады достизающим, и слуху сему во ушеса всeх распространяющуся, и милостию Пребезначальныя Троица по всeм градом вси бояре и воеводы и все христолюбивое воиньство и всенародное множество православных христиан помалу разгарающеся о Бозe духом ратным. И вскорe сославшеся, сподвигошяся от всeх градов, со всeми своими воинствы поидошя к царьствующему граду на отмщение крови христианскиа.

БОЯРЕ И ВОЕВОДЫ

От Колуги боярин и воевода князь Дмитрей Тимофeевичь Трубецкой, а с ним дворяне и дeти боярские и стрелцы, и казаки, и всякие служивые люди многих розных городов.

От Переславля Залeсского воевода Иван Васильевичь Волынской да князь Федор Волконской, а с ними дворяне, и дeти боярские многих розных городов и стрелцы и казаки и всякие служивые люди.

От Коломны думной дворянин и воевода Прокофей Петровичь Ляпунов, а с ним дворяне и дeти боярские и многие атаманы и казаки и всякие служивые люди.

От Тулы Иван Заруцкой, а с ним дворяне и дeти боярские многих городов и многие атаманы и казаки и севрюки³ и всякие служивые люди.

От Володимеря Иван Просовецкой з дворяны и з дeтми боярскими и с черкасы и с казаки, со многими людьми.

И от иных многих городов всякие служивые люди вси приидошя под царьствующий град Москву и вкупe снемшеся, и бысть многочисленое воинство.

Польские же и Литовские люди и Руские измeнники изыдошя противу их, и бысть им бой велик; от обою страну пишя мнози смертную чашу. И Божиею милостию одолeшя еретиком православнии и многих Поляков и Нeмец побили и во град потоптали и Бeлово каменово города от Москвы рeки взяли круглую башню и Яузские и Покровские, и Фроловские и Устрeтенские и Петровские и Тверские ворота. И вниде все христоименитое воиньство в каменой в Большой город, а Польских и Литовских людей осадили в Китае городe и в Кремлe, а Нeмец осадили в Новом в Девиче монастырe.

Во обители же Живоначальныя Троица архимарит Дионисей и келарь старец Аврамей со всeм освященным собором и со всею братиею по вся дьни совершающе молебнаа, моляще Всещедраго, в Троицы славимаго Бога, и Матерь Слова Божиа и великих чюдотворцов Сергиа и Никона о помощи и о укрeплении на врага всего христолюбиваго воиньства и освятивше воду, и со святыми водами тогда приeжжал под Москву к бояром и воеводам и ко всему воиньству старец Аврамей Палицын. И пришед паки укрeпляя от Божественых Писаний все христолюбивое воиньство.

По сем же архимарит и келарь по совeту бояр и воевод писали в Казань по прежеписанному к пресвященному Ефрeму, митрополиту Казанскому и Свиязскому, и к бояром и воеводам и ко всему воинству Казанского государьства и в Нижней Новъград и во всe Понизовные городы и в Поморие о великом разорении Московскаго государства и о собрании под Москвою христолюбиваго воинства. И им бы такожде быти в соединении и стати обще на отмщение крови христианскиа и приити в сход под царьствующий град Москву. Казаньского же государьства и всeх Понизовных и Поморских городов бояре и воеводы и всякие служивые люди и все народное множество всeх чинов, тако же и прежде бывшия под Смоленском у Польского короля Жикгимонта дворяне и дeти боярские и всякие служивые люди, Смольяне и Новгородцы и иных многих Украинских городов, и сии вси, слышавше о разорении Московского государства и собравшеся под царьствующий град, вси приидошя; и сшедшеся, вскорe взяшя Новой Девичь монастырь да Большово Бeлово города взяли Олексeевскую башню и Водяные и Черторские и Арбацкие ворота и Никицкие, а за Москвою рeкою против ворот острошки поставили и сотвориша Польским и Литовским людем велику тeсноту.