Глава 62

Глава 62

О ПОСЛEХ

В лeто 7119-го (1610 г.) сентября в 9 день избравше всею Росийскою землею в послы пресвященнаго Филарета, митрополита Ростовскаго и Ярославскаго, да князя Василиа Васильевича Голицына, да князя Данила Ивановича Мезецкого, и думных дворян и дьяков; приидошя же послы под Смоленск в табары х королю Польскому и Литовскому Жигимонту октября в 7 день.

Того же мeсяца в 19 день пред королем Польским и Литовским Жигимонтом ставше послы царьствующаго града Москвы, моляще короля, дабы дал сына своего на государьство Московское. И по малeх днех еще четырижды бышя послы, совeтующе з сенатари и з гетманы. И на четвертом сходe сказали сенатари и гетманы, что пожаловал король, сына своего Владислава хочет дати, еже быти ему на Московском государьствe царем. Медлящим же послом сицевыя ради вины под Смоленском всю осень и зиму, и не бe к Москвe праваго отвeта: будет ли или не будет королевичь на государьство Московское. По четвертом бо сходe посольском с Москвы от Московских боляр х королю с повинною гонец прибeжа, дворянин Иван Безобразов, понеже бояре, отпустивше послов под Смоленеск и не дождавшеся от них грамот, и вскорe все воинство Польское и Литовское пустишя в город. Се же содeашя зло сами себe волею и неволею: волею бо, яко мнози королю доброхотствующе, неволею, яко мнози к вору Колужскому¹ начяшя прямити² и зсылатися.

Начальник же Польского воинства гетман Желковской повелe с царя Васильа Ивановича Шуйского платье сняти и отвести в плeн х королю Жигимонту, Польскому и Литовскому; тако же и братию его, князя Дмитреа с княгинею и князя Ивана Шуйских послашя х королю. Послы же таковаго зла дeла не увeдeшя. Патриарх же Ермоген много о сем плакася и много бесчестиа прият от измeнников и от Поляков. Потом же Поляки все державство Московское начашя правити и вездe своя воеводы и судиа начяшя поставляти, и всяка крeпость града Москвы за их стражьми бысть; и наряд пушечной и пищальной весь отъемше и внесше внутрь града Кремля и Китая. И по всeм градом Росийским посылаху своя угодники.

И того ради посольство х королю Польскому бездeльно бысть, и в бесчестии бышя посланнии от Московского государьства; их же начяшя до конца оскорбляти и гладом томити. Сам же король беспрестанно промышляя, како бы град Смоленеск взяти. Послом же повелe отказати, что не будет королевичь на государство Московское. Сенатари же и гетманы рекошя послом: «Вы однe, послы, токмо бездeльничаете, а Московское государство все королю хочет служити и прямити во всем». И показываху челобитные за руками, кто что у короля просит. И того ради послы до конца отчаяшяся и не вeдуше, что сотворити. Нeции же от них и к царьствующему граду возвратишяся. Гетман же Желковской и с Поляки начат казну царьскаго дому грабити: ово себe с Поляки, ово же х королю под Смоленеск посылаа. Та же и наряд хотяше с Москвы под Смоленеск послати. По всей же Руской земли начат посылати дани великия и оброки имати.

И кто ту бeду изглаголет, каковы бышя правежи³ по всeм градом православным христианом? Но и о сем Поляки не утeшишяся, но паки оружием препоясуются и повсюду ратным обычаем насилуют.