Глава 51

Глава 51

О ПРИХОДЕ ВО ОБИТЕЛЬ ДАВИДА ЖЕРЕБЦОВА
СО МНОГИМИ ЛЮДЬМИ, И О ПРЕПИТАНИИ РАТНЫХ
МОЛИТВАМИ ЧЮДОТВОРЦА, И О УМНОЖЕНИИ МУКИ
И СУХАРЕЙ И РЖИ, И О БЛАГОДАРЕНИИ
АРХИМАРИТА ИАСАФА, И О НИЩЕЛЮБИИ ЕГО И
О ПОБEГЕ СОПEГИНE И ЛИСОВСКАГО СО ВСEМИ ЛЮДЬМИ

Слышаще же в Троицком Сергиеве монастыре, яко князь Михайло ис Переславля изгна Литву и Руских измeнников и мостяща пути трупом нечестивых, даже и до слободы Александровские и строящася добрe пути кровныя изсушити. Архимарит же Иасаф и иноцы и воеводы и прочии сидeльцы посылают ко князю Михаилу Васильевичю от дому чюдотворца, просяще с моленьми помощи, понеже оставшеи людие изнемогошя. И послан бысть от князя Михаила Давид Жеребцов и с ним 600 мужей избранных воин и триста сим служащих. Молитвами чюдотворца проидошя ничeм не задержани, ни подзаратаи¹ ни стражьми не увeдены бышя; и легцы суще всего протекше скоро, неимуще с собою к препитанию никаких потреб, оскорбляются, а не пекутся о препитании мучащихся в бeдах, но строят о себe полезнаа. И вземлет Давид все строение на себя. И запасом монастырским памяти счетныя² отъемлет же. За рукою же старца Макариа взял в житницах 20 четей³ ржи да с 200 четей сухарей, да в хлeбне муки ржаные 40 четей, да овса 7776 четей. Мельница же конская испорчена тогда, и лeсу не бысть и строити еe нeчим. Тако же и молоти нeкому же бe: людие бо трудники вси изомроша; и мелюще токмо на день по три осмины⁴ ржи или овса, пекуще же на день по четыре квашни, в квашни же по 5 четей. Да к тeм же хлeбом по вся дни емлюще в трапезу сухарей четвертей по девяти, и по десяти, и по 11.

Архимарит же Иасаф, яко же исперва начат, тако же и до сего времени печашеся о бeдных и нищих и бe око слeпым и нога хромым. Аще и не своима рукама и ногама, но всeх всячески упокоевая и без слез немогий взирати на плачющая и скорбя с воздыхающими; и всяк просяй что и тщима руками не отхождаше от него.

Оставшии же иноцы, видяще ратных насилование, отца же Иасафа к бeдным и нищим попечение, и яко же преже о том роптаху на нь, такожде и в то время и потом и в лице тому пришедше сваряхуся⁵. Боголюбивая же душа прощениа просяще от всeх и тихими словесы наказуя о всем благодарити Господа. И рек: «Лучши нам умрети, неже престати сирот миловати; и не оставит нас великий Сергий гладом истаяти». Зрите вси слышащеи, колик скор заступник уповающим на нь великий отец наш Сергий. Убо сей Иасаф прост сый, ни пророк ни знаменоносец⁶, но уповав вeрою и не посрамися, яко вдова она, питавшия Фезвитянина, послуша бо того глагола, и не оскудиша малыя пригорщи, и довлeшяся в три лeта и мeсяца 6. Во истину бо «праведницы и по смерти живи суть», яко же и днесь пред очию всeх содeяся. Мнeша бо тогда иноцы оставшеи, еже на едину седьмицу дней токмо пищи, протягну же ся время от малых тeх останков питания на 80 и 4 дьни, октября от 19 генваря до 12 дьни. В той бо день Сопeга и Лисовской от Троицы со всeми людьми с Польскими и Литовскими побeжали к Дмитрову.

О ПОМОЩИ ЧЮДОТВОРЦА В НЕНАДЕЖНЫХ ВЫЛАСКАХ

Дивно же се всегда бываше, егда исперва сeдошя людие во осадe в Троицком Сергиевe монастырe даже и до пришествиа Давыда Жеребцова, егда исхождаху на брань к сопостатом. Егда убо устроятся людие и уготовятся с великим опасением, то не всегда на добро бываше исшествие. Аще ли же о чем надежно изыдут, то и пагуба бываше. Похвалное же что содeяся, и то не урядством⁷, но послeднею простотою. И дива слышание достойно. Внегда убо узрят противных гдe стоящих и с простотою храбръствующих или близ стeн бeсующихся, держими же воеводами, да не погибают напрасно, и не могуще изыти и друг на друга позирающе, сердцы растерзахуся. И замышляюще кождо себe нужду и потребу, у приставленных над ними испрошахуся: едины травы ради, друзии же воды, инии дров добытиа, инии корениа ископати, овии же вeников нарeзати, овии подале отманящеся⁸ ко кладязю чюдотворца воды исцeлениа ради почерпсти. Поляки же, радующеся таковому неустроению, и яко пси на заяцов повсюду напущаху, и зачинающуся кровопролитию на многих мeстех: не 10 бо или 20, но и пять, и три, и два порознь бродяще смерти искаху. Против же врагов, егда нахождаху на них, вкупe ополчевахуся. И нечестно исходящеи честны побeдители показовахуся. Спасителя же нашего хранением в таковой простотe никъто же никогда погибе, но вси здрави до единаго возвращахуся в дом преподобнаго.

Давид же Жеребцов, егда прииде и видe таковую простоту твориму во исходищих на выласки, их же много бесчестив и отслав прочь, не повелe с собою исходити на брань. Надежен же на избранное воинство и к раздражителем добрe урядився исходит извeдатися; стиснув же ся с сопостаты, и со срамотою одолeваем, вмeсто же пота побeдительства слезами облияся, урядный неурядно утече. И помалe, еще дышя рвением, исходит мститися. К нему же простцы рекошя на пути: «Мы, государь болярин, преже сего прося у чюдотворца Сергиа помощи, малоурядно исхаживали, и занеже не подается нам, но яко овцы исходихом, пастырь же нашь сам нами промышляя и не погуби нас николи же». Давид же, вeжди з гнeвом возводя на пререкующих, и исхождаше ко врагом на бой. Смятию же брани бывши⁹, и зрят простцы мужа храбра и мудра нестроение; но по его отречению не смeют помощи тому подати. Видяще же, яко кедры посечены имут быти в дубравe и не дождавшеся своея надежи опустошитися и по обычаю простоты немощнии бранию ударивше, и исхищают мудрых от рук лукавых. Гордящеи же ся к тому немощных и бeдных не нарицают овец, но львов, и не сирот, но господей, и единотрапезников спосаждают; и помещут Немецкую мудрость и приемлют покрываемых от преподобнаго буесть¹⁰. И в простотe суще забывше бeгати, но извыкше врагов славно гоняти.

О ПРИХОДЕ ГРИГОРИА ВАЛУЕВА

Мeсяца генваря в… день, в 4 час нощи прииде из слободы Александровы от князя Михаила Васильевича в Троицкой Сергиев монастырь воевода Григорий Валуев, а с ним избранных вой 500 мужей храбрых во оружии. Сии убо приидошя извeдатися с Литовскими людьми и с Рускими измeнники и войско их смeтити. Егда же освитающу дьни и совокупльшеся з Давидом и с Троицкими сидeльцы, храбрии же они воини из града исходят храборски и наглe нападают на Польские и Литовские роты. И втопташя их в Сопeгины табары и станищя их около табар зажгошя. И милостию Пребезначальныя Троица Литовских людей многих побили и языки поимали. Сопeга же и Лисовской со всeми полки своими исшедше противу их, и бысть им бой велик на Клемянтeевском полe, на Келаревe прудe и на Волкушe, и на Красной горe. И много бившеся и мнози от обою страну пивше смертную чашу, множайше же сугубо погибе полку еретическаго; и разыдошяся обои. И день той препроводивше во обители чюдотворца, сотворше заповeданное им, паки возвратишяся ко князю Михаилу Васильевичю. На Польских же и Литовских людей и Руских измeнников тогда страх велик нападе и в недоумeнии бышя, яко же оставшиися по них сказашя.

О ПОБEГЕ ГЕТМАНА СОПEГИ И ЛИСОВСКАГО

И генваря в 12 день гетман Сопeга и Лисовской со всeми Польскими и Литовскими людьми и с Рускими измeнники побегоша к Дмитрову, никим же гонимы, но десницею Божиею; толико же ужасно бежашя, яко и друг друга не ждуще и запасы своя мещуще. И велико богатство мнози по них на путех обрeтаху, не от хуждьших вещей, но и от злата и сребра и драгих порт и коней. Инии не могуще утечи и возвращающеся вспять и лeсы бeгающе, прихождаху во обитель к чюдотворцу, и милости просяще душям своим и повeдающе, яко «мнози видeшя от нас велики зeло два полка гонящя нас, даже и до Дмитрова». Чюдиша же ся вси о сем, яко от обители не бяше за ними никакой посылки. Князь Михайлов же приход уже и отчаян, и моление от обители к нему презрe.

По отшествии же сынов беззаконных преждавше осмь дьней, посылается от обители чюдотворца к царьствующему граду к государю старец Макарей Куровской со святою водою, генваря в 20 день. Еще же опасение бяше в дому чюдотворца от врагов, и с людьми считающеся и их же к питанию восхотeвше смeтити; и еще муки обрeтше в хлeбнe четей з десять, такожде и сухарей четей с пятьдесят. Всeх же во удивление чюдо сие введе, како от малых сих запасов на толико время простреся до преизобильства; и не токмо же человeком, но и скотом. Вяще бо числа здe реченнаго преизбысть: дающе бо тогда конем на все воинство по 90 четей на день да монастырским и воеводским лошадем по 10 четей на день; и кормим бe весь скот за сто дней от овса того. По разшествии же ратных всeх изо обители и еще останцы того овса мнози осташяся на потребу великими бедами искушенным от Бога. Егда же князь Михаил, не мало время преминув, прииде из слободы в дом чюдотворца со всeм воинством с Рускими людьми и с Нeмьцы, и все воинство от тeх же малых останков довольствовашяся. Такожде и весь скот свой от житниц же чюдотворца питаху довольнe. И по отшествии его и всего воинства многим препитание бысть.