Глава 50

Глава 50

О ЛЬСТИ ПОЛЯКОВ И О ВЗЯТИИ СКОТА ИХ ВО ГРАД

Богоборцы же Польские и Литовские люди, такожде и Руские измeнницы, егда поражены бышя от Руских людей, паче же от Бога, бeгуще из-под Колязина монастыря, пленишя многие волости и села и деревни: Ростовской, и Дмитровской, Переславской и Слобоцкой уeзд; и множество всякого скота награбишя, и наругающеся градским людем гладным, иже седяху во осаде во обители чюдотворца Сергиа, и попущаху великия стада скота по запрудной сторонe на Красной горe и на Клементиевском поле; вкупe же и блазняще из града осадных людей на выласку, чтобы отъeхати их от града. И того по много время попущающе стада в день и в нощь. Они убо лукави суще, яко лисица и яко хищнии волцы, сатаниным коварством сие умыслишя над гладными сидeльцы. Бог же не оставляет раб своих, уповающих на Нь. И совeт их тако не совершися.

Мeсяца же августа в 15 день в самый свeтлый всемирный праздник Пресвятыя Владычица нашея Богородица, честнаго и славнаго Ея Успениа, из Сапeгиных табар по первому своему злому лукавству, паки попустишя скот свой в то же прежереченное мeсто. Троицкие же сидeльцы конные, выeхавше из града по-тиху Благовeщенским врагом, сторожей Литовских побили, и, залучивше стада их, погнаша ко граду. С пивново же двора изшедше пeшие люди, и тако вогнашя скот во град, благодаряще Бога и Пречистую Преблагословеную Владычицу Богородицу и великих чюдотворцов Сергиа и Никона, яко здравы отидошя от толика воинства Литовских людей, и ничим же не врежены, толицы мали суще числом. Еще же и о сем дивно есть. И егда скот погнашя к монастырю, тогда той скот сами скоро ко граду потекошя, никамо же обращающеся и ничим же задержими во град внидошя.