Глава 28

Глава 28

О ВЗЯТИИ ЛИТОВСКОГО НАРЯДУ

Того же дни градстии же людие, овии убо от многого труда во град внидошя, овым же еще дерущимся с Литвою и с Рускими измeнники, нeкоим же боголюбивым иноком вложи Бог благую мысль, и приидошя на пивной двор к чашнику старцу Нифонту Змиеву глаголюще: «Отче Нифонте! Врази наши одолeвают нам, но святая Троица дарова нам бeдным велику помощь над враги: подкопы их отняли и зарушили; и к тебe сего ради приидохом: даждь нам о сем совeт, чтобы еще отняти у Литовских людей туры и своему воинству помощь и отраду сотворити». Старец же Нифонт, и с прочими старцы посовeтовав, и вземше с собою двeстe человeк ратных и старцов тридeсят и поидошя с пивново двора на выласку; и прешедше прудовую ручевину, и взыдошя на Красную гору к туром и к наряду Литовскому. Вeсть же в монастырe учинися, яко Троицкое воинство на Литовской наряд поидошя.

Осадные же люди скоро пришедше ко вратом градным х конюшенным, и нужею¹ воеводу Алексeа Голохвастова и приставов вратных премогошя и граднаа врата сами отворишя и устремишяся спeшно к туром; взыдошя на Красную же гору. Литва же и Руские измeнники из-за туров своих стрeляюще изо многих пушек и пищалей и из мeлково оружиа, и збиша людей Троицких под гору к пивному двору. Множество же народа паки второе устремишяся нуждею и взыдошя ис подгориа великою силою, приступающе к туром, к наряду к Литовскому. Богоборцы же начяшя стрeляти изо многых пушек с Волкуши горы поперек Троицкаго воинства и в тыл с Терентиевские рощи и мног мятеж учинишя, и ужасть в Троицких людех. Они же видeвше, яко устрашишяся Троицкое воинство от стрeляниа их, и абие полки их и Литовские и Руские измeнники вси, вскорe вышедше из-за туров своих, и градских людей всeх под гору согнашя. С стeн же градных стрeляюще по них, возвратишя их вспять. Они же возвращьшеся и заиграшя во вся игры, яко градских людей прогнашя от наряду своего. Градские же люди совeтовавше отойти во враги: в Благовeщенской, да в Косой, да в Глиняной враг, инeм же Троицким еще бьющимся с Литвою за Круглым прудом и за капустным огородом, близ Келарева пруда. И озрeвшеся и не видeвше градских людей на горe ни у пивного двора единого человeка, и ужасошяся, мнeвше всeх побитых от Литовских людей, но токмо видяще у святых ворот и на Нижнем монастырe первых людей вылазных дерущихся с Литвою и с казаки. Градские же люди утаившиися во врагeх: в Благовeщенском, и в Косом, и в Глиняном, от них же Иван Ходырев да Троицкие слуги Ананья Селевин с немногими людьми, всeдше на кони и устремившеся полем позади туров Литовского наряду; и бe полчек их мал зeло; пред полчком же тeм Троицким, глаголют, видeшя з города многие люди воина вооружена, лице же его, яко солнце, конь же под ним, яко молниа блистаася. И в той час вскочив с людьми Троицкими в первые туры, тако же и в вторые, и в третьие, и в четвертые, и в пятые, и обьявительна видeша его Божиа посланника и помогающа православному христианству, дондеже и наряд взяша. И тако невидим бысть, даровав помощь и одолeние на враги. Троицкое же воинство, конные и пeшие, скрывшеися вскорe изо врагов вышедше, приступльше к первым туром к Литовскому наряду. Литва же и казаки Руские побeгошя к другим туром. Градские же люди, побивающе их лютe, тако же из других и ис третьих выгнашя; о четвертых же и о пятых турах наряду своего Литва и казаки укрeпишяся и бьяхуся крeпко. И ту под Борисом Зубовым убишя коня. Литва же многиа люди искочьше хотяху Бориса жива взяти. Троицкой же слуга Ананиа Селевин мужествен и с прочими воинскими людьми устремишяся на Литовских людей, и прогнашя их за туры. Вскорe же подоспeшя к ним многие люди, Иван Ходырев и дeти боярские, и слуги, и все множество народа, и внидошя в четвертые и пятые туры к Литовскому наряду. Слуга же Меркурей Айгустов первeе всeх поспe к туром. Пушкарь же литвин уби Меркурья ис пищали. Тому же пушкарю отсeкошя главу. И тако помощию Живоначальныя Троица многых Литовских людей побили и языков нарочитых панов живых взяли с литаврами и с трубками и со многими знамяны во град введошя. Да тут же взяли восмь пищалей полуторных и полковых и всякого оружиа Литовского, затинных и изрядных самопалов и рушниц², копей же и кортов³, палашей и сабель, пороху же бочки и ядер, и всяких запасов множество во град внесошя. Останцы⁴ же с турами и с тарасы и со оставшимся зелием вся огню предашя. Людей же Троицких убитых и раненых побраша и во град внесошя. Пламени же разливающуся и поядающу здания еретик, гетман же Сапeга, видeв заимающася огнем твердeйшаа станица своя, побeже в таборы своя, тако же и злый еретик лютор Лисовской. Вся же сиа содeяся во един день в среду, мeсяца ноября в 9 день, на память святых мученик Анисифора и Порфириа. За три убо часа до свeта начашя битися и до самого вечера кровь лияшеся. В той день подкопы зарушили и наряд Литовской взяли. И благодатию Пресвятыя Троица бысть в Троицком Сергиеве монастырe радость и веселие всему православному христианству о величии Божии, яже сотвори Бог преславнаа в той день.

Боголюбивый же архимарит Иасаф с братьею повелe звонити даже и до полунощи. Сам же со освященным собором и со всею братьею в храмe Трисоставнаго Божества молебны поюще, хвалу и благодарение возсылающе Богу, и Пречистей Богородици, и великим чюдотворцом, Сергию и Никону, и всeм святым, иже от вeка Богу угодившим. Изочтошя же Троицких всяких побитых людей того дни 174 человeки да раненых 66 человeк. Архимарит же убьенных постричи повелe, от них же Иван Внуков – во иноцех Иона, Иван Есипов – во иноцeх Иосиф, Данило Дмитрeев сын Протопопов с Москвы от Покрова со рву – во иноцeх Давид, Троицкие слуги Данило Селевин, Меркурей Айгустов – во иноцeх Мефодей, и иные многие; и причастишяся святых Таин Христа Бога нашего, преставишяся ко Господу. Воеводы же, и дворяне, и все воинство Сергиева монастыря, изшедше за град соглядати трупиа мертвых Литовских и Руских измeнников на Красной горe у наряду их по рву и в ямах побитых и у прудов у Клемянтeевсково, и у Келарева, и у Конюшенново, и у Круглово пруда, и около церквей Нижнево монастыря, и около мельницы, и против Красных ворот у подкопных рвов, и смeтивше⁵ Литвы и измeнников 1,500. Да сказали полоняники и выходци раненых до 500. Воеводы же и все христолюбивое воинство приговорили со архимаритом и з братьею послати к Москвe к государю с сеунчем⁶ сына боярсково Переславца Ждана Скоробогатово.