Глава 27

Глава 27

О ВЫЛАСКE И О ОБРEТЕНИИ ПОДКОПОВ И О ЗАРУШЕНИИ ИХ

Воеводы же, князь Григорей Борисовичь Долгорукой и Алексeй, урядивше полки вылазных людей, приидошя в церковь святыя Живоначальныа Троица, знаменавшеся к чюдотворным образом и к цeльбоносным мощем преподобнаго отца нашего Сергиа чюдотворца. И пришедше ко вратом потаенным, повелeшя выходити по малу и во рву укрыватися. В то же время с пивново двора вышли головы в воеводское мeсто Туляне: Иван Есипов, Сила Марин, Юрьи Редриков Переславец с своими сотнями и з даточными людьми на Луковой огород и по плотинe Краснаго пруда. Так же и ис конюшенных ворот вышли со многыми знамены головы дворяне: Иван Ходырев Олексинец, Иван Болоховской Володимерец, Переславцы Борис Зубов, Афонасей Редриков и иные сотники с сотнями, с ними же и старцы Троицкие во всeх полках. И егда начашя из града выходити за три часа до свeта, и абие наидошя облацы темныя, и омрачися небо нелeпо¹, и бысть тма, яко ни человeка видeти. Таково Господь Бог тогда и время устрои своими неизреченными судбами. Людие же вышедше из града и ополчишяся. И абие буря велика воста и прогна мрак и темныя облаки и очисти воздух, и бысть свeтло. И егда ударишя в осадныя колокола потрижды, тако бо повелeно им вeсть подати, Иван же Ходырев с товарыщи, призвавше на помощь святую Троицу и крикнувше многыми гласы, нарекше ясак² Сергиево имя, и вкупe нападошя на Литовских людей нагло³ и мужествено. Они же, услышавше ясак той, и абие возмятошяся и, гнeвом Божиим гонимы, побeгошя.

В то же время от святых ворот голова Иван Внуков с товарыщи и со всeми людьми прииде против подкопов на Литовских людей, возвавше тойже ясак, збивше Литву и казаков под гору на Нижней монастырь и за мелницу. А Иван Есипов с товарыщи своим полком бьющеся с Литвою по Московской дорогe по плотинe Краснаго пруда до Волкуши горы, старцы же Сергиева монастыря ходяще в полках бьющеся с Литвою и укрeпляюще люди не ослабляти в дeлех. И тако вси охрабришяся и бьяхуся крeпко, глаголюще друг другу: «Умрем, братие, за вeру христианскую!» И благодатию Божиею тогда обрeтошя устие подкопа. Въскочьше же тогда в глубину подкопа ради творимаго промысла крестьяне Клемянтиевские Никон, зовомый Шилов, да Слота; и егда же зажгошя в подкопe зелие с калы⁴ и смолу, заткавше устие подкопа, и взорва подкоп. Слота же и Никон ту же в подкопe згорeшя. Градстии же людие приступающе крeпко к Волкушe горe к наряду Литовскому; они же стрeляюще из-за туров. Тогда же ранили голову Ивана Есипова и Троицких людей прогнали до Нижняго монастыря. Голова же Иван Внуков, обратився с своими людьми от Нижнево монастыря по плотинe и по пруду, и прогна Литву и казаков на Терентeевскую рощу и до Волкуши горы побиваше их нещадно. Троицкой же слуга Данило Селевин поносим бываше отъeзда ради брата его Оски Селевина, и не хотяше измeнничья имени на себe носити и рече пред всeми людьми: «Хощу за измeну брата своего живот на смерть премeнити!» И с сотнею своею прииде пeшь к Чюдотворцову Сергиеву кладязю на измeнника атамана Чику с казаки его. Данило же силен бяше и горазд саблею и посeкая многих Литовских людей, к сему же и трех вооруженых на конех уби. Литвин же удари Данила копием в груди, Данило же устремися на Литвина того и уби его мечем, сам же от раны тоя начат изнемогати крeпцe. И вземше его, отведошя в монастырь, и преставися во иноческом образe. Головы же Иван Ходырев, Борис Зубов со своими сотнями и прогнаша Литву и казаков за мельницу на луг. Иван же Внуков остася на Нижнем монастырe. Атаман же Чика уби Ивана Внукова из самопала. И отнесошя его в монастырь. И бысть Троицким людем скорбь велиа о убитых дворянех и слугах, понеже бышя мужествени и ратному дeлу искусни. Троицкое же воинство паки справяся убили дву полковников, дворян королевских, Юрья Мозовецкого да Стефана Угорскаго, да четырех рохмистров желнырских и иных панов; и всяких людей многих побили и поранили. А живых поиманных языков во град введошя.