Глава 25

Глава 25

О ИВАНE РЯЗАНЦE

Тоя же нощи прииде в Троицкой монастырь выходець из Лисовских табар казак Иван Рязанец станицы атамана Пантелеймона Матерово, а сказал, что подкопы подлинно поспeли под нижнюю под Круглую башню.

Да тот же казак Иван Рязанец сказал сицеву повeсть: «Дeялося дe в прошлую нощь с суботы на недeлю: было явление атаманом и казаком, а сказывал атаман нашь Пантелеймон Матерой, тако же и от нас мнози видeли своима очима; и иных станиц атаманы и казаки многие то же видeние видeли и глаголы старца слышели жестоки з запрeщением. Видeшя бо около града по поясу ходящих дву старцов, брады сeды, свeтозарны образом, яко быти им по образу и по подобию великим чюдотворцом Сергию и Никону. Един же в руцe имeяше кадильницу злату, а над кадильницею животворящий крест и кадяще обитель свою и огражаше честным и животворящим крестом стeны града. Другий же имeяше в руцe своей правой кисть, яко кропило, в другой же руцe чашу, и кропя святою водою стeны и прочая вся во обители и поюще своими усты велегласно тропарь «Спаси, Господи, люди своя…», кондак «Вознесыйся на крест…», оба до конца. И обращься к нашим полком преподобный, от лица же его неизреченный свeт сиаше, яко огнь паля, и глаголаше ярым гласом и жестоко претя: «О злодeи законопреступницы! Почто стекостеся разорити дом Пресвятыя Троица, и в ней Божиа церкви осквернити, и иночествующых и всeх православных христиан погубити? Не даст вам жезла на жребий свой Господь!» Нашим же окаанным казаком и Литовским людем по них стрeляющим из луков и из самопалов, стрeлы же и пульки наши от них отскачюще, к нам возвращахуся и многих уязвляху; и многые люди ранены от тeх пулек в наших полцeх помрошя на извещение и на болшее чюдо прославляющу Богу угодников своих». И тоя же нощи во снe явися преподобный чюдотворец Сергий атаманом и многим казаком.

Тeм же образом явися и гетману, и радным паном, и рохмистром, претя жестоко и глаголя сице: «Мольбу на вас злодeев сотворю Вышнему Царю, и во-вeки осуждени будете мучитися в геонских муках». И бышя, яко молния и громи страшни, и от востока истече рeка велика, а от запада и полудне два езера велики, и снидошяся вси трие во едино; и взыде вода, яко гора велика, и потопи всe полки Литовскиа и всeх безвeстно сотвори. На утриа же съшедшеся Сопeга и Лисовской и со всeми Рускими измeнники вкупe и сказывающим им сны своя друг другу и глаголюще: «Что се хощет быти? Воды многи потопишя полки нашя». Тогда же предстоя пред ними Донской атаман Стефан Епифанец станицы Смаги Чертенского, имeя под собою войска пятьсот казаков, и глагола им: «Великиа гетманы, аз скажу вам: сны сиа не на добро бывают. Се убо знамение являет преподобный Сергий чюдотворец: яко не водам повелeвает потопити, но множество православных христиан вооружит на нас. И велико падение нашим людем будет». Литовские же люди великою кручиною обьяти бывше, сиа слышавше, и совeщашя его с казаки побити, глаголюще, яко «сей возмущает полкы нашя и ужасает люди воинскиа». Стефан же и казаки, увeдeвше сиа, и собравшеся вси пятьсот человeк и тоя же нощи побeгошя, обeщавшеся ко Святeй Живоначальнeй Троицe и Пречистой Матери Божии и великим чюдотворцом Сергию и Никону потом таковаго зла не творити ни царьствующему граду, но с православными християны стояти за один на иновeрныя; и призывающе в помощь великых чюдотворцов. Полцы же Литовскиа догнашя их в Троицкой волости в Вохне на рeкe на Клязмe. Они же помиловани бышя от Бога молитв ради преподобных отец Сергиа и Никона, отойдошя от Литовских людей ничим же невреждены. Тако же и Оку рeку превезошяся ниже Коломны и приидошя на Дон к своему атаману вси здравы.

О сем же знамении и о Стефанe Епифанцe атаманe принесошя ми писанийце оставшиися иноцы во обители чюдотворца, ово же словом повeдающе ми о сем. Аз же и сиа повелeх здe вписати, аще истинна есть и сия, яко да не обрящуся от Бога раб нерадив и презорив о чюдесeх преподобных отец. Сия же доздe.

Воеводы же совeтовавше со архимаритом Иасафом и з старцы и со всeми воинскими людьми, чтобы очистити ис-под городовыя стeны в ров потайные ворота для скорые выласки. Каменосeчьцы же, сыскавше старой вылаз подлe сушильныя башни, и очистили и трои двери придeлашя к ним желeзные.