Глава 23

Глава 23

О ПОБЬЕНИИ ГРАДСКИХ ЛЮДЕЙ
И О УЖАСТИ ВЕЛИЦЕЙ ВО ГРАДЕ

Мeсяца ноября в 1 день, на память святых безсребреник Козмы и Дамиана, во втором часу дни из града устроишя выласку конными и пeшими людьми на Литовских людей. Богу же попустившу грeх ради нашых, и сего ради охрабришяся на нас врази и многых градских людей побили и поранили, подщавшихся положити главы своя за святую православную вeру и за обитель преподобнаго чюдотворца Сергиа. И на том бою убили слугу нарочита¹ Копоса Лодыгина ис пушки, и соверши его Бог во иноческом чину преставитися. Тогда же на выласкe грeх ради наших побили и поранили Троицких всяких людей 190 человeк да в языкы взяли на подкопном рвe старца священника Левкию, да трех служних людей, да Московского стрелца, да дву Клемянтeевских крестьянских дeтей. Архимарит же раненых постричи повелe и причастившеся Тeла и Крове Христа Бога нашего, и преставишяся в вeчныя обители. И погребошя их честно, соборнe отпeвше над ними надгробныя пeсни. А живых раненых лечити повелe и покоити монастырскою казною. Еретическое же исчадие и измeнницы Руские горше перваго ратоваху град. Тогда же бысть во градe всeм православным христианом скорбь велика, и плачь велик, и ужасть ради подкопов, понеже слух во ушеса всeх людей разыдеся, что ведут Литовские люди подкопы, а о том достигнути не могут, под которую стeну или башню ведут. И тако вси смерть свою койждо пред очима видяще, и вси притичюще к церкви Живоначальныя Троица и к целбоносным мощем теплых заступников нашых великих чюдотворец Сергиа и Никона, и вси на покаание к Богу обратишяся, исповeдающеся Господеви и отцем своим духовным; ови же и причастишяся Тeла и Крови Господня, к смерти готовящеся.

О УТEШЕНИИ ИНОК

Добродeтелнии же суще иноцы, обходяще по всему граду, моляще христолюбивое воинство и всeх людей, глаголюще: «Господие и братие, прииде час прославити Бога и Пречистую Его Матерь, и святых великых чюдотворцов Сергиа и Никона, и нашу православную христианскую вeру! Мужайтеся и крeпитеся и не ослабляйте в трудeх, ни отпадайте надежею, яко да и нас помилует и прославит Всещедрый Господь Бог! Не унывайте убо в скорбeх и бeдах, нашедших на ны, но упование возложим на Бога и на молитвы великих наших заступников Сергиа и Никона и узрим славу Божию! Той бо может избавити нас от рук всeх врагов наших! Аще ли, братие, кто и постражет нынe во время се, той мученик будет Господеви своему, понеже пострада за превеликое Его имя!» И тако укрeпляюще всeх православных христиан, сущих на стeнах града; и сего ради вси паче охрабришася, биющеся крeпце со враги своими. Воеводы же повелeшя стрельцом и всяким охочим людем исходити из града нощию тайно ради языков по ямам и во рвeх, что они ископали близь града. И милостию Божиею языков много емлюще и водяще во град. Подкопнаго же мeста никако же возмогошя у них довeдатися: вси глаголюще, что есть подкоп, а под которое мeсто ведут, того не вeдают.