Глава 21

Глава 21

О ВЫЛАСКE И О ПОИМАНИИ ПАНА БРУШЕВСКАГО

Воеводы князь Григорей и Алексeй со всeм христолюбивым воинством, пeвше молебен соборнe, учинишя выласку на Княже поле в Мишутинской враг на заставы рохмистра Брушевского и на Суму с товарыщы. И Божиею помощию заставу побили и рохмистра Брушевского Ивана взяли, а рохмистра Герасима на Княжом полe, и роту его побили, а Сумину роту топтали¹ до Благовeщенского врага. Врази же, видeвше своих падение, и вскорe приидошя многими полки конные и пeшие. Градстии же людие, мало-по-малу отходяще, внидошя вси во град здрави и ничим же вреждены. Архимарит же со освященным собором, пeвше молебны со звоном, благодарственыя хвалы воздающе Всемогущему Богу. Брушевской же пан в роспросe и с пытки сказал, что подлинно ведут подкопы под городовую стeну и под башни. А под которое мeсто ведут подкопы, того, сказал, не вeдает. «А хвалятся дe наши гетманы, что взяти замок Сергиев монастырь и огнем выжечи, а церкви Божиа до основаниа разорити, а мнихов всякими различными муками мучити; а людей всeх побити; а не взяв монастыря, прочь не отхаживати. Аще и год стояти, или два, или три, а монастырь взяти и в запустeние положити». Богоборцы же тогда разъяришяся вельми и начяшя гражданом стужати² злe и залегошя по ямом и по плотинам прудовым, не дающе градским людем воды почерпсти, ни скота поити. И бe во градe тeснота и скорбь велиа, и мятеж бe велик осадным людем.