Глава 19

Глава 19

О ЯВЛЕНИИ ЧЮДОТВОРЦА СЕРГИА
И О ПРИСТУПE И О ЗАПАЛЕНИИ ПИВНОГО ДВОРА

В день недeльный по утренем пeнии пономарь Илинарх сeде почити и в забытии сна бысть. И абие видит в келию его вшедша великаго чюдотворца Сергиа и рекша ему: «Скажи, брате, воеводам и ратным людем; се к пивному двору приступ будет зeло тяжек, они же бы не ослабeвали, но с надежею дерзали». И видe святаго ходяща по граду и по службам, кропяща святою водою монастырская строениа.

По извeщении же чюдотворца с недeли на понедeльник в третием часу нощи, никому же чающу, возгремeшя изо множества наряду, и многочисленое воинство Литвы со гласом многым устремишяся к стeнам градским со всeх стран; против же пивного двора, вземше множество бремен дров, хврастиа, соломы, смолу з бересты и з зелием, и зажегше острог у пивного двора. И от того огня объявишяся вси полцы. С стeн же града и с пивново двара из-за тарасов, ис пушек и ис пищалей много побиша Литвы и огни их угасишя, и острогу подсeчи не дашя. Тако же и по иным стeнам града и з башен козы¹ со огнем спущающе, и Литовских людей многих побишя, понеже приидошя близ града.