Глава 14

Глава 14

О ПОСТАВЛЕНИИ ОКОЛО ГРАДА СТEНОБИТНЫХ ХИТРОСТЕЙ

Того же мeсяца в 30 день, богоборцы Сапeга и Лисовской, приимше отписку и видeвше к ним непокорение градских людей, и исполнишася ярости и повелeшя всему своему Литовскому и Рускому воинству приступати ко граду со всeх стран и брань творити. Градстии же людие биющеся с ними крeпко. Сапeга же и Лисовской повелeшя туры¹ прикатити и наряд поставити. И той нощи туры многие прикатили и наряд поставили. Первые за прудом на Волкуше горe; другие за прудом же подли Московской дороги; третьи за прудом же на Терентeевской рощи; четвертые на крутой горe против мельницы; пятые туры поставили на Красной горe против водяные башни; шестые поставили на Красной же горe против погребов и пивново двора и келаревых келей; седмые по Красной же горe против келарские и казенных полат; осмые из рощи на Красной же горe про тив плотнишные башни; девятые туры поставили на Красной же горe подлe глиняново врага, против башни конюшенных ворот. И подлe туров ископашя ров велик: из рощи от келарева пруда и до глиняново врага, и вал высок насыпали, и по за тому валу конные и пeшие люди ходяще.

О НАЧАЛE СТРEЛБЫ ПО ГРАДУ

Мeсяца октября в 3 день начашя бити из-за всeх туров и биюще по граду шесть недeль беспрестанно изо всего наряду и из верховых, и разженными желeзными ядры. Обитель же Пресвятыя и Живоначальныя Троица покровена бысть десницею Вышняго Бога, и нигдe же не зажгошя. Ядра бо огненые падаху на празные мeста в пруды и в ямы мотыльныа², а разженые желeзныя ядра из древяных храмин безпакостно изимающе. А иже увязнувших в стeнах не узрят, тии сами устываху. Но воистинну убо дeло се промысл бысть самого Превeчнаго Бога Вседержителя, яже творит преславнаа, ими же вeсть неизреченными своими судьбами. Сущии же на стeнах града людие, не могуще стояти, сохраняхуся за стeны: изо рвов бо и из ям меж зубцов прицeлены бышя пищали. И тако людие стояще неотступно, ждуще приступу, и о сем едином и крeпляхуся. А иже в башнях у наряду, и тeм велика бeда бысть и муки от стрeляниа. Стeнам бо градным трясущимся, и камению разсыпающуся, и вси злe страждуще. Но дивно о сем строение Божие бe: во время бо стрeляниа зряще вси плинфы³ разсыпающеся и стрeльницы и стeны сътрясаемы, по единому бо мишеню от утра даже до вечера стрeляние бываше, паки же стeны нерушимы пребываху. Сповeдающе же часто о сем врази, яко «зрим всегда в стрeлянии огнь исходящь от стeн и дивимся о сем, что не от камени, но от глины искры сыплются». И бысть во градe тогда теснота велиа, и скорбь, и бeды, и напасти. И всeм тогда сущим во осадe кровию сердца кипяху, но от полезнаго дeла, еже наченше, не престаху. Смерти же ожидаху, но на Господа Бога упование возлагаху и всяко ко врагом сопротивляхуся. Еще же блядяху⁴ богоборцы Лютори и песьими своими языки богохулнаа и никоея же надежи на Господа Бога имeти глаголюще. «И не возможете», – глаголюще, – «избeжати от рук нашых никако же». Тако же поругающеся имени великаго чюдотворца Сергиа и ина многаа и богохулная блядяху.