Глава 13

Глава 13

О ДУМE ПАНОВ

Того же мeсяца в 29 день Польские и Литовские люди и с первосовeтники своими, Рускими богомерскими отступники, всячески размышляюще и совeтующе тщетнаа. «Коими образы», – глаголюще, – «возможем взяти Троицкой Сергиев монастырь, или коею хитростию уловити можем?» И тако совeт составляют: ово приступы взяти, яко некрeпок глаголюще град и низкостeнен; инии же ласкою и грозою повелеваху у воевод и у народа прошати монастыря. «Аще и сим не увeщаем их, и мы кийждо свой подкоп под городовую стeну подведем и без крови можем град взяти». Сице же совeт их положен бысть. На себе бо уповашя, а не на Бога жива, Царюющаго вeкы. Яко же писано есть «да не хвалится силный силою своею», вси бо, надeющеися о силe своей, погибошя. «Во-истинну всуе всяк человeк и суетно течение его». И паки: «Избавлю избраннаго моего от оружиа люта и осeню над главою его в день брани».

Сиа же они совeтовавше и ничто же успeшя. Но всуе трудишяся: без Божиа бо помощи ничто же может сотворити человeк. Бог бо есть творит, яко же хощет. И воли Его кто противится? Совeт же гетману Сапeгe и Лисовскому сице уложившем, и в 29 день прислашя во град Троицкой Сергиев монастырь сына боярсково Безсона Руготи с листом. Тако же и архимариту з братьею з грозами, имeющь образ сицев:

ГРАМОТА

От великаго гетмана Петра Павловича Сапeги, маршалка¹ и секретаря Кирепецкого и Трейсвяцкаго и старосты Киевскаго, да пана Александра Ивановича Лисовскаго во град Троицкой Сергиев монастырь воеводам, князю Григорию Борисовичю Долгорукому, да Алексeю Ивановичю Го лохвастову, и дворяном, и дeтем боярским, и слугам монастырьским, и стрeльцом, и казаком, и всeм осадным людем, множеству народу. Пишем к вам, милуючи и жалуючи вас: покоритеся великому государю вашему, царю Дмитрию Ивановичю. Здайте нам град Троицкой Сергиев монастырь. Зeло пожалованы будете от государя царя Дмитреа Ивановича. Аще ли не здадите, да вeсте, яко не на то есмя пришли, не взяв града прочь не отойти. Наипаче же сами вeсте, колицы гради царя вашего Московскаго взяхом; и столица вашя Москва и царь вашь сeдит во осадe. Мы же пишем к вам, снабдяще благородие ваше. Помилуйте сами себе: покоритеся великому имяни государю нашему и вашему. Да аще учините тако, будет милость и ласка к вам государя царя Дмитриа, яко ни един великих вас у вашего царя Василиа Шуйского пожалован есть. Пощадите благородство свое, соблюдите свой разум до нас. Не предайте себе лютой и безвременной смерти; соблюдите себе, и паки – соблюдите сами себе и прочих. Аще же за сею ласкою увидите лице наше. А мы вам пишем царьским словом и со всeми избранными паны заистинствуем, яко не токмо во градe Троицком намeстники будете от государя нашего и вашего прироженного, но многые грады и села в вотчину вам подаст, аще здадите град Троицкой монастырь. Аще же ли и сему не покоритеся, милости нашей и ласки и не здадите нам града, а даст Бог возмем его, то ни един от вас во градe вашем милости от нас узрит но вси умрут злe.

Тако же и архимариту пишут:

А ты, святче Божий, старeйшино мнихом, архимарит Иасаф, попомните жалование царя и великого князя Ивана Васильевича всея Русии, какову милость и ласку стяжал к Троицкому Сергиеву монастырю и к вам мнихом великое жалование. А вы беззаконники все то презрeли, забыли есте сына его государя царя Дмитриа Ивановича, а князю Василью Шуйскому доброхотствуете и учите во градe Троицком воинство и народ весь сопротив стояти государя царя Дмитриа Ивановича и его позорити и псовати² неподобно, и царицу Марину Юрьевну и нас. И мы тебe, святче архимарит Иасаф, засвидeтельствуем и пишем словом царьским: запрети попом и прочим мнихом, да не учат воинства не покарятися царю Димитрию, но молите за него Бога и за царицу Марину. А нам град отворите без всякиа крови. Аще ли не покоритеся и града не здадите, и мы за раз взяв замок вашь и вас беззаконников всeх порубаем.

Архимарит же Иасаф з братьею и воеводы и все воинство, видeвше лукавую лесть, яко всячески хотят разорити дом Пресвятыя Троица, и вси вкупe со смиреномудрием, с плачем и рыданием Господа Бога моляще о избавлении града, глаголюще сице: «Надежа наша и упование, Святая Живоначальная Троица, стeна же нашя и заступление и покров, Пренепорочная Владычица Богородица и Приснодeва Мариа; способники же нам и молитвеници к Богу о нас, преподобнии отцы наши велицыи чюдотворцы Сергий и Никон!» Сими же словесы и благоумными совeты в богоспасаемом градe Троицком монастырe благодать Божиа со упованием всeм сердца на подвиг адаманта твердeйша укрeпи.

О ОТПИСКE К ПОЛЯКОМ И КО ВСEМ ИЗМEННИКОМ

Воеводы же, князь Григорей Борисовичь и Алексeй приговорили с архимаритом Иасафом и с прочими соборными старцы и з дворяны и со всeми воинскими людьми против их льстивыя грамоты к Сопeге и Лисовскому отписку учинишя сице:

Да вeсть ваше темное державство, гордии начальницы Сапeга и Лисовской и прочаа вашя дружина, вскую нас прельщаете, Христово стадо православных христиан, богоборцы, мерзость запустeниа; да вeсте, яко и десяти лeт христианское отроча в Троицком Сергиевe монастырe посмeется вашему безумству и совeту. А о них же есте к нам писасте, мы же, сиа приемше, оплевахом. Каа бо польза человeку возлюбити тму паче свeта и преложити лжу на истину и честь на безчестие, и свободу на горкую работу? Како же вeчную оставити нам святую истинную свою православную христианскую вeру Греческаго закона и покоритися новым еретическим законом отпадшим христианскиа вeры, иже прокляти бышя от четырех вселеньских патриарх? Или кое приобрeтение и почесть, иже оставити нам своего православнаго государя царя и покоритися ложному врагу Вору и вам Латине, иновeрным, и быти нам, яко Жидом или и горши сих? Они бо, Жидове, не познавше Господа своего, распяшя, нам же, знающим своего православнаго государя, под их же царьскою христианскою властию от прародителей наших родихомся в виноградe истиннаго пастыря Христа, како оста вити нам повелeваете христианского царя? И ложною ласкою, и тщетною лестию, и суетным богатством прельстити нас хощете. Но ни всего мира не хощем богатства противу своего крестного целованиа.

И тако с тeми грамотами отпустивше в табары.