Увещательное послание ко градом Тверския паствы

УВЕЩАТЕЛЬНОЕ ПОСЛАНИЕ
КО ГРАДОМ ТВЕРСКИЯ ПАСТВЫ
ПО ПОСВЯЩЕНИИ ВО АРХИЕПИСКОПА
НА ТВЕРСКУЮ ЕПАРХИЮ ОКТЯБРЯ
10 ДНЯ 1770 ГОДА.

Богоспасаемыя Тверския паствы Богохранимым градом Твери, Кашину, Торжку, Старице, Ржеву, Зубцову, и Осташкову, и всякой веси и живущим православным Христианом, всякаго чина и состояния, возлюбленным Богу, благодать и любы и мир от Бога Отца нашего, и Господа Иисуса Христа.

Благословен Бог и Отец Господа нашего Иисуса Христа, Отец щедрот, и Бог всякия утехи, иже по мнозей своей милости, действием Помазанницы Своея, Благочестивейшия Самодержицы нашея, избрал мене, аще и недостойнаго, к подъятию ига Евангельскаго, и к прохождению звания Архиерейскаго, пасти церковь, кровию его искупленную, и именем Его запечатленных управляти божественным словом на всякое дело благое, приуготовляя чрез оное к пристанищу спасения вечнаго. Того ради воображая и чувствуя сей долг мой, во первых благодарю Божественному промыслу, тако о мне благоволившему, и молю благость Его, да поможет мне соответствовать святому Его званию, и соблюсти благодать Архиерейства в чистоте совести. При сем вас, любезнейшая врученная мне паства, приветствую духом моим, и желаю пастырски, да благословение Божие всегда будет над всеми вами: при том молю, да всяк из вас в должности, в каковую кто от Бога призван, пребывает радетельно, честно и богоугодно. Священники! имейте попечение о врученных вам Христианских душах, наставляйте их учением слова Божия, и добраго жития пример в самих себе показывайте: ибо горе тому, иже взял ключь разумения, но ни сам не входит в двери царския; и других не вводит. Монахи! обещание свое храните в воздержании и целомудрии, и Христианския святости образец представте в житии своем. Господа! родительское попечение прилагайте о подчиненных вам, и своим благоразумным и человеколюбивым правлением снискивайте им благополучие и времянное и вечное; памятуя, яко и вы сами Господа имате на небесех. Раби! повинуйтеся своим Господам, и их возлюбите, яко же детям любити отца подобает, работающе, не аки пред очами человеческими, но аки пред очами самого Бога. Судии! сохраните правду, и судите великому и малому без лицеприятия, охраняя себя от всякия страсти и мздоимства, яко суд Божий есть. Подчиненные судиям! не будите мстительны и сварливы: любовию Христианскою снисходите к немощам братий ваших, и побеждайте благим злое; ибо сим образом не токмо себе, но и обществу покой приобрящете, и поставленных над вами судей от многих затруднений и безпокойств избавите. Родители! имейте попечение о добром детей ваших воспитании, наставляйте их в законе Господни, не соблазняйте их младыя души худыми поступок своих примерами, а паче добрыми и разумными своими нравами ко всякой честности их приуготовляйте. Дети! любите и почитайте родителей своих: их наставления храните в сердце своем, и в старости праведно снабдевать их не оставляйте. Купцы! служите обществу честным своим трудом, и от лжи и неправды себя охраняйте; ведая, яко самый больший прибыток есть благочестие с довольством, а не со излишеством. Земледельцы и художники! пребывайте в благословенном труде своем, и блюдитеся от всякаго обмана и развращения, и молитвою своею к Богу прибегать не забывайте. Всех же православных Христиан, всякаго чина и состояния, молю: препровождайте жизнь свою, яко же прилично благочестивым Христианам и честным гражданам, да целомудренно и праведно и благочестно поживем в нынешнем веце, ждуще блаженнаго упования и явления славы великаго Бога и Спаса нашего Иисуса Христа. Отторгающихся же от соединения православныя нашея церкви, и недугом раскола немоществующих да обратит милосердый Господь к соединению, да вкупе с нами едиными усты и единым сердцем в союзе любви и согласия прославят Бога Отца и Господа нашего Иисуса Христа со Святым Духом. Наконец смиренно всех прошу и о мне недостойном пастыре вашем приносить Богу свои молитвы, да поможет мне вседействующая благодать Его, безпреткновенно и радостно проходить звание мое, к славе Его божественной, к созиданию святыя церкве, к благоустроению общества, и ко удовольствию всех вас. Благодать Божия да пребудет со всеми вами, Аминь.